دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
************
” سيد حجاب “
مولانا سيد حجاب
يا قمر ف ليل أحباب
حاضر ف كل غياب
غيرت عنوانك ؟؟
و اخترت يوم موعود
شاهد على مشهود
ساند على مسنود
و علامة ف ادانك
يا حروف بتجمعنا
يا مهندس المعنى
احلامنا أوجعانا
يضمها ميدانك
سيد قلوب عشاق
الحلم فيهم داء
و طريقه ليهم دواء
و طلعت ف اوانك
ترسم طريق النور
بأغانى تهدم سور
تنصف طريق مغدور
بحروف ف وجدانك
يا سيد الكلمات
اللى كتبنا ما مات
عايش ف روح نغمات
تجمعنا بأدانك
» و منين بييحى الرضا
من الإيمان بالقضا »
مسحراتى الوطن
و الحلم و الموال
يا أه
يا عين
يا ليل
وف كلمتك يا حجاب
يتجمع الاحباب
تفتح لروحنا الباب
و نطير معاك فى السما
سيد حروف المعانى
صياد جواهر أمانى
تنسجها لحن و أغانى
تشق عتمة غما
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق