دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
************
” هنكمل المشوار ”
موجتين يا ثورة يناير
ولسه بتعافرى
وكل ما تقربى
تسيبينا و تسافرى
بفعل فاعل او بقلة بوعى
نفس النتيجة
مكتوب نبتدى فى السعى
الثورة
لو محكمتش م الاول
هتوه و تطلع وحوش
تخطفها م الميادين
تجار وطن أو دين
يفتتوا الثوار
و يوزعوا الادوار
و فى النهاية نتوه
فى بحر ما له قرار
يا سادة يا ثوار
يا سادة يا احرار
علشان نكون شطار
و نحقق الاهداف
لازم نكون واحد
راسمين طريق للنهاية
عارفين بداية البداية
يجمعنا بيت واحد
نحلف و نتعاهد
نكمل المشوار
ننسى ذواتنا العليلة
ونتعالى على جراحنا
الرؤية واضحة
والطريق معروف
اكتب بروح الحروف
الكل لازم يكون واحد
ساعد بيمسك فى ساعد
و صفوف وراها صفوف
صوت الجموع حاسم
مهما الغباء عاند
دم الشهيد شاهد
يا ثورة يا مغدورة
جاى الاوان تخرجى
و تشكلى الصورة
و علامة النصر ترجع
تانى منصورة
مسحراتى الوطن
و الحلم و الموال
يا أه
يا عين
يا ليل
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق