دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
************
” إلا جراح الوطن “
كل الجراح بتهون
الا جراح الوطن
ساكنة ف نبض الروح
و معششة فى البدن
يا قلوب يا متشوقة
يا حروف ما بين السطور
سكتنا مهما الشقى
حتما يصيبها الدور
الحلم مهما اتخطف
طالعة فروعه جدور
الصبر مهما طال
آخر عذابه نور
مسحراتى الوطن
و الحلم و الموال
يا أه
يا عين
يا ليل
مصر الأمل و النور
غير مصر الضلام و السور
باب الأمل
يطرح نهار و زهور
باب الضلام
يحاصر الحلم الجسور
يا شمس يا مغيمة
يا ضباب يا مالى السما
يا ليالى يا معتمة
يا رؤية صابها العما
النور هيطلع نهاره
و الحلم عارف مداره
و مهما لفوا و داروا
هنغنى يوم إنتصاره
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق