دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
—————–
” صنافير يا أخت تيران “
حتى الطوابع قالتها
تيران دمانا روتها
شهدا ورا شهدا
ورمالها كتبتها
بحروف صنعها الدم
يا مخلوقين م العدم
من راسكوا حتى القدم
جيشنا مهوش م الخدم
لعدونا الأبدى
يا ولدى يا كبدى
عضمك فى أرض الجدود
شاهد على مشهود
يا من حميت الحدود
من مينا حتى النصر
صنافير يا أخت تيران
يا رمز عزة مصر
يا أمننا القومى
يا بوابتنا الأولى
خط الدفاع الأساسى
من ساسى الى راسى
ارواحنا ياما شالتها
حتى الطوابع قالتها
جوه حدودنا رايتها
مسحراتى الغضب
و الاحتجاج
و الشوق
الجدر مادد لفوق
يحلم بفك الطوق
من ليل غميق لشروق
والصوت يشق الحلوق
و الروح بتنسج
من الجروح موال
الليل طويل
لكن النهار جوال
حبوا الوطن يا بنات
حبوا الوطن يا عيال
حبوا الوطن فى هدايته للإنسانية
أول حضارة علمت فى الدنيا
حبوا الوطن فى النور و فى الشدة
اللى بنى مصر كان عاشق و له غيه
فلاح اصيل و بناها من ندى جبينه
بالساقية و بمنجله و بفاسه والأزميل
روى ارضها بالعرق و النيل و بالمواويل
حبوا الوطن بالتاريخ و بالحساب و الجبر
احموه من الهكسوس و من تتار العصر
حبوه فى فجره و ف ساعات العصر
و فى انتكاسته زى ما تحبوه فى نصر
حبوه جمعا زى ما تحبوه فى قصر
حبوا الوطن يا بنات
حبوا الوطن يا ولاد
مسحراتى بطول البلاد
اصرخ ليلاتى
اصحوا و فوقوا لكل آتى
رمضان كريم
شهروعظيم
فيه العظات و المعجزات و الانتصار
الفجر لازم يولد نهار
و الصبح مولود من نور ونار
مسحراتى و ف إنتظار
الأمة ترفع راية انتصار
رمضان كريم
يا نايم إصحى
وحد الرزاق