دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
***********
” الشهيد محمد الجندى ”
ومين ينساك
يا وردة فتحت تيار
شق الطريق ف ليلنا نهار
لبكرة الجى
يا ضلة و ضى
وحدوتة بنرويها بنور و بنار
لمحتك فى الندى تسقى
الشجر و الدار
و روحك تنده العشاق
مصر أمانة ف ايديكم
ومهما العتمة تأذيكم
واصلوا و كملوا المشوار
قدرنا ندفع المكتوب
روحنا و دمنا وقلوب
لست الكل
و يفضل حلمنا صاحى
لا عمرة يمل
و لا خطاويه ف يوم هتكل
و مين ينساك
يا جندى يا ابن روح شيلاك
فى قلب الكل
يا عقد الفل
مسحراتى الوطن
و الحلم و الموال
يا اه
ياعين
يا ليل
و احنا اللى فيكى جدور
رحلتنا نور ورا نور
فى العتمة ضى و ندى
نروى الأراضى البور
نزرع بذور الحلم
نحصدها تانى جدور
دايرتنا دور ورا دور
رؤيتنا جيل ورا جيل
و زهور تسلم زهور
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزا