دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
***********
” أنا بوصلتى فلسطين “
أنا بوصلتى فلسطين
من أول التاريخ
وحتى يوم الدين
مهد سيدنا المسيح
مسرى سيدنا محمد
اولى الفبلتين
و ثالث الحرمين
انا بوصلتى فلسطين
درس التاريخ للمؤمنين
ومثال رباط الصامدين
علامتها واضحة و باينة
من الهكسوس للصهاينة
غزاة و را غزاه
الصوت ينادى صداه
النصر اخر مداه
الفجر لاح و الصباح
من الحجر للسلاح
أجيال ورا أجيال
من بعد تغريبة
عارفه طريق الكفاح
مليون سلامة و تحية
على الإرادة القوية
فى مواجهة الصهيونية
المجد للإنتفاضة
و للحجارة الفتية
صاينة و حاضنة القضية
فى قلوب بريئة و نقية
يا رب وعدك يقين
يا رب انت المعين
ومهما طال الزمن
انا بوصلتى فلسطين
مسحراتى الوطن
و الحلم و الموال
يا اه
يا عين
يا ليل
هلى يا سيرة الأحرار وضمينى
خلينى بعد الضنى أعرف صلاح دينى
و نوري لنا طريق العتمة و اسقينى
من نبع صافى شريانه يعدينى
نبع المقاومة طول عمره فلسطينى
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق