دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
************
” إفتح لحلمك باب “
افتح لحلمك باب
اذا الحصار إشتد
الجزر مهما طال
حتما وراه المد
إخلق فى روحك نهار
و إمشى فى طريق النور
الحلم عابر سبيل
يعدى سور ورا سور
يا قلوب يا متشوقة
تلمح ندى و زهور
تسمع أدان الفجر
من بعد عتمة و بور
مهما الطرق تنسد
مهما الصراع يحتد
لكل فعل رد
مضاد فى الاتجاه
ومساوى له ف القد
و اللى يزيد عن حد
بينقلب للضد
افتح لحلمك باب
إذا الحصار إشتد
مسحراتى الوطن
و الحلم و الموال
يا اه
يا عين
يا ليل
مماليك و حاكمينك
و مطلعين دينك
بايعين تراب طينك
و يتاجروا بمصالحه
بيعزوا فى عدوك
و يصوتوا لصالحه
بيبيعوا تار دمك
و يزودوا ف جارحه
مماليك و منحطين
تجار وطن أو دين
شياطين ولاد شياطين
بيخونوا عيشك و مالحه
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق