دقيت على طبلتى
على طبلتى دقيت
و صحيت على ندهتى
و بندهتى صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتى
من قلب حلم اتولد
مسحراتى ليلاتى
سارح بطول المدد
الصوت بيرجع صدى
و الصبر ابن الجلد
بدد يا نور عتمتى
طبطب على طبلتى
يروى الندى سكتى
و الحلم يطرح بلد
***********
” نقطة ومن أول سطر “
افتح صفحة
من كراسة قديمة
اكتب فى العنوان
عادت ريما
اوصلها بأخر صفحة
مكتوب فيها
حكمانا عصابة
فاجرة و نصابة
و يناير ثورة
على حكم ديابة
ارجع تانى
و افتح صفحة
من كراسة جديدة
اكتب عنوان
بعد الموجتين
عادوا لمقاعدهم
نفس الاشكال
نفس الاوحال
نفس الاندال
رجعوا لعصابتهم
خدعوا الملايين
أساليب شياطين
ووحوش وديابة
و قوانين غابة
و سياسة لئيمة
بيبيعوا و يشتروا فينا
و يوزعوا على كيفهم
فى غنيمة
اكتب تانى
فى اخر الصفحة
عادت ريما
لو حسيت بالقهر
افتح صفحة لبكرة
و اكتب فيها
نقطة و من أول سطر
مسحراتى الوطن
و الحلم و الموال
يا اه
ياعين
يا ليل
الفساد طلع لسانه
كل لص و عاد مكانه
العصابة هيه هيه
رجعوا من تانى و بانو
و اللى مش عاجبه نظامهم
ملعون و يشرب من كيعانه
يا ايها السادة اللصوص
كلمة واحدة راح نقولها
كله بأوانه
كل ظلم و له نهاية
و كل فجر و له ادانه
مسحراتى و انادى
يا ولادى يا احفادى
رمضان كريم
شهر و عظيم
فيه العظات و المعجزات
و الإنتصار
الفجر لازم يولد نهار
و الصبح مولود من نور و نار
مسحراتى و ف انتظار
الأمة ترفع راية انتصار
رمضان كريم
يا نايم إصحى
وحد الرزاق
*********