دقيت على طبلتى

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

***********

” تيران وصنافير مصرية “

اللى بيموتوا ف حروبك

و اللى عاشقين شوك دروبك

غير الل بيبيعوا ف ترابك

يشبعوا على كفر جوعك

اللى قافلين البيبان

سدوا ع الشمش الحيطان

بيسلموكى للشيطان

المصانع و الغيطان

حتى صنافير أو تيران

كل حاجة مستباحة

ينشروا شوارعك قباحة

بلطجة و شغل البجاحة

و الغبا بلادة و تناحة

فوقى م الوهم الكبير

و اطلعى من بير سكاتك

اللى شاريينك جدور

و اللى حاكمينك فواجر

اخرجى من أى سور

إلحقى كل اللى فاتك

لسه جوانا النهار

بينادينا نور و نار

لسه أحرارك شداد

مهما كان ليلك سواد

مسحراتى الوطن

و الحلم و الموال

يا اه

يا عين

يا ليل

بين المصرى اللى بجد

و المصرى العار و العيرة

صنافير و تيران

الحد الفاصل بين الحق

و بين البهتان

بين الوطنى

و بين بايع طينه

تاجر بيبيع وطنه

و يبيع دينه

لكفيل و عميل للصهيونى

ملعونه سياساته و سنينه

مسحراتى و انادى

يا ولادى يا احفادى

رمضان كريم

شهر و عظيم

فيه العظات و المعجزات

و الإنتصار

الفجر لازم يولد نهار

و الصبح مولود من نور و نار

مسحراتى و ف انتظار

الأمة ترفع راية انتصار

رمضان كريم

يا نايم إصحى

وحد الرزاق

*********

ليلة الثالث من رمضان

الاثنين 29 مايو 2017